Wis 1

Tí mana tigabi ngago gubalini ho holene nga, lenego ogo

1Dindini agali homogo kemiru tígua mana tigabi ngago gubalini ho holene nga. Tígua Ngode Datagaliwabe kago mitangi bialu ibu taya bialu kemigo howa tíninaga mini tigabiore howa taya bilimu. ^a 2Ai wali agalime Ngode Datagaliwabe kago ibu abi henedabe hondole bahandaga karu tigua Ngode Datagaliwabe karia handa walia naholebira. Anigo wali agali Ngode Datagaliwabehondo mini mbiraorewi karu ibuni tihondo mo walia holebira. 3Mohondo halu ohagane mana ngagome wali agali Ngode Datagaliwabe yu wahalu kaundiaha haru halu pu wahaga. Wali agali mini bayale ndo wua howa Ngode Datagaliwabenaga hongo abidabe hondolenaga bahandalu karia Ngode Datagaliwabehanda tini mo taga haga ka. 4Mini gigabi ibu wali agali mana ko bulene ngagoha haga kago baba mandagi nahaga. ^b 5Wali agali mini tigabi talialu haga kago ibugua ke̱ holene mana ngago erembira miaga ka. Ani bialu wali agalime bi tiga nabi lulu bi lalu kagoria ti nahe ibida pialu wali agali mbirame mende kagohondo mo ko hayagua ti mogo timbuni laga.

Iname bi laramago Ngode Datagaliwabehanda hale hai haga lenego ogo

6Mini gigabi ibu Ngode Datagaliwabenaga Dinini ka. Ibugua wali agali gubaliniore haga kago mbiralime Ngode Datagaliwabe mege biyagua nde ibugua ko ogoni mo wanahaga ka. Anidagua biagago irane Ngode Datagaliwabehanda wali agalinaga miniha hame ngagobi mini ngagobi manda biaiho howa tinaga bi larago bibahende hale hai haga ka. 7Ai Ngode Datagaliwabenaga Dinini dindi bibahendeha ho to̱lai kago ani howa ibugua mbirale ngaru bibahendeore mo mandagi hilamaga howa yu haga ka. Ani howa wali agalinaga bi larago manda biai ho haga ka. 8Ani howa wali agalime bi ko layagua ibu hale hai haga kago tigua lado habe nahe. Ani bidagome Ngode Datagaliwabehanda tini ko biya lenegonaga pani nolebira. 9Ngode Datagaliwabe ibugua baya hanguore begelo handai howa wali agali ko biaga karunaga mini wu karu baya hangu mo talebu ki bulebira. Anduane Homogohanda tigua bi latagi hararu baya hanguore ogoale laragoni lalu mo tale bulebira. Ani mo tale buwa ko birida laragola tigua beregedalu dai bulene nawulebira. 10Ngode Datagaliwabehanda wali agali tigua ibuni kago helalu kaundiaha pelo hame naleore howa ibugua tinaga bi larago damene bibahendeore baya hangu hale haiore haga ka. Bi hale habe nahe ohowa layaguabi ibugua hale haiore haga ka.

11Ani kago ai tígua Ngode Datagaliwabehondo keba howa lai lalu bi loligo de hondo holene nga. Mana ogonibi ngagome tíni biamogo bulene mbira nawulebiraore. Ngode Datagaliwabehondo bi nagalone ngago lolene nawiorego irane bi emene ohowa lalu kego damene bibahendeme í̠niha genda mo yu anda ibulene wulebira. Tígua ke̱ halu haga hemigua nde mana ogonibi beremigome tí mo ko holene wulebira.

Ngode Datagaliwabehanda homolene hariga mo wia nabiore lenego ogo

12Tíha mo ko holene wuligo tí lulu ale howa hopebe bu nahalimu. Tínaga mana ko biaga ngemigome tíni homagane kemi. 13Irane Ngode Datagaliwabehanda homolene mo yu anda naibaga ka. Ani kagome ibu mbirale homene ngaru hondowa turu nahaga ka. ^c 14Mbirale ngarubi karubi ibugua wabiai hene. Mbirale uruni bibahende bayale hai helo hame lo ka. Mbirale bibahende ibugua wabini ngaru bayale dege ngelonaga wabini. Mbirale uruniha tini mo ko halu homagane mo yu anda ibulene ale mbira nawabini. Homa ibugua dindi ogo handaya ho ha nabigo. 15Irane mana tigabi bulene ibu Ngode Datagaliwabe ibunaga ngagome ibu ereba holenebi homolenebi ibuha nawi.

Anigo wali agali ko bu karu tinime bi ko lalu mana ko bialu kagome homolene mo yu anda ibaga. Tigua homa ibu bayalebe toba howa tigua homa heba mandagi hole hongo haabo haga ka. Tigua homa baba habo nalolene bi lowini ngagome tini homa heba ho mbiraore ho haga ka. ^d

16

Mini gigabi wuleneme wali agali Ngode Datagaliwabenaga hearu biamogo bialu waitigi bu karu mo ko hai haga.

(Be 10—12)